दुष्काळ, नापिकी आणि कर्जबाजारीपणामुळे शेतकऱ्याची आत्महत्या; वरसाडे तांड्यात शोककळा

वरसाडे तांडा, ता. पाचोरा, जि. जळगाव | शुक्रवार, दि. १३ नोव्हेंबर २०२६

वरसाडे तांडा येथील शेतकरी कैलास प्रधान राठोड यांनी आज (शुक्रवार) सायंकाळी ६ वाजेच्या सुमारास गळफास घेऊन आत्महत्या केल्याची दुर्दैवी घटना घडली. या घटनेमुळे वरसाडे तांडा परिसरात शोककळा पसरली असून गावातून हळहळ व्यक्त केली जात आहे.

प्राथमिक माहितीनुसार, दुष्काळ, शेतीतील नापिकी आणि वाढत्या कर्जबाजारीपणामुळे कैलास राठोड आर्थिक संकटाचा सामना करत होते. शेतीतून अपेक्षित उत्पन्न मिळत नसल्याने आणि आर्थिक अडचणी वाढत असल्याने ही दुर्दैवी घटना घडल्याचे सांगितले जात आहे. मात्र आत्महत्येमागील अजुन नेमके कारण अधिकृतरीत्या स्पष्ट होणे बाकी आहे.

घटनेनंतर पुढील कायदेशीर व वैद्यकीय प्रक्रियेसाठी मृतदेह शासकीय रुग्णालय, पाचोरा येथे पाठवण्यात आला आहे.

या घटनेने पुन्हा एकदा शेतकऱ्यांच्या आर्थिक परिस्थितीचा आणि शेतीसमोरील गंभीर संकटांचा प्रश्न ऐरणीवर आला आहे. प्रशासनाने या घटनेची गांभीर्याने दखल घेऊन मृत शेतकऱ्याच्या कुटुंबाला तातडीने शासकीय मदत मिळवून द्यावी, अशी अपेक्षा व्यक्त होत आहे.

शेतकऱ्यांच्या आयुष्यातील आर्थिक अस्थिरता, नापिकी आणि कर्जाचा प्रश्न केवळ आकडेवारीपुरता मर्यादित नसून त्यामागे अनेक कुटुंबांचे आयुष्य गुंतलेले आहे.